Պայմաններ

Ընդհանուր Դրույթներ

Մրցանակաբաշխությանը կարող են մասնակցել այն կայքերը, որոնք բավարարում են մրցույթի հետևյալ պայմաններին.

ա. ստեղծվել են 2010-2012 թվականների ընթացքում, կամ վերոհիշյալ ժամանակահատվածում ենթարկվել են նկատելի փոփոխության (դիզայնի, բովանդակության, կիրառվող տեխնոլոգիայի)
բ. բավարարում են հետևյալ պայմաններից որևէ մեկին.

Նախատեսված են հայկական (Հայաստան կամ սփյուռք) շուկայի համար, կամ
Ներկայացնում են Հայաստանի, հայերի, հայկական սփյուռքի մշակույթը, պատմությունը, խնդիրները և այլն, կամ
Ամբողջովին պատրաստված են Հայաստանում գրանցված ընկերության կողմից

Բոլոր այն կայքերը, որոնք համապատասխանում են «ա» պայմանին և «բ» պայմանի չափանիշերից առնվազն մեկին, կարող են մասնակցել մրցույթին:

Մրցույթին մասնակցության հայտեր չեն ընդունվի այն կայքերի կողմից, որոնք ունեն պոռնոգրաֆիկ կամ բռնություն քարոզող բովանդակություն, կամ քարոզում են ատելություն մարդկանց որևէ խմբի նկատմամբ` ըստ կրոնական, սեռային, ռասայական, սեռական կողմնորոշման կամ ազգային պատկանելության: Եթե Ժյուրին ուսումնասիրության ընթացքում հայտնաբերի նման կայքեր, որոնք կարողացել են գրանցվել մրցույթին, ապա դրանց մասնակցությունը կդադարեցվի:

Գրանցման կարգը

Մասնակցելու համար անհրաժեշտ է կայքը գրանցել ArmNet նախագծի պաշտոնական կայքում (www.armnetawards.am), որտեղ մասնակից կայքերից յուրաքանչյուրը կունենա հատուկ էջ: Կայքը մրցույթին գրանցելիս պետք է ներկայացնել դրա ընդհանուր նկարագիրը, նշել թեմատիկ պիտակները, որոնց միջոցով այցելուները կկարողանան հեշտորեն գտնել մասնակից կայքը և ծանոթանալ դրա հետ: Եթե կազմակերպիչները համարեն, որ նշված պիտակը չի համապատասխանում կայքին կամ ունի գովազդային բնույթ, ապա կարող են հեռացնել կամ փոփոխել այն:

Մասնակից կայքի առաջին էջում անհրաժեշտ է տեղադրել մասնակցության վահանակը, որը կարելի է գտնել www.armnetawards.am կայքում: Գրանցումից հետո մրցույթի կազմակերպչական թիմը ստուգում է կայքի համապատասխանությունը «Մասնակցության պայմաններին»: Կազմակերպիչներն իրավունք են վերապահում իրենց չհաստատել կայքի մասնակցությունը մրցույթին, եթե այն չի համապատասխանում «Մասնակցության պայմաններին»:Կայքի մասնակցության հաստատումից հետո մասնակից կայքերը www.armnetawards.am կայքի հատուկ կատալոգում կդասակարգվեն ըստ այբբենական կարգի, սակայն կարելի է մասնակից կայքերի ցանկը դիտել նաև ըստ պիտակների: Եթե կայքն ունի նաև մոբայլ տարբերակ, անհրաժեշտ է նաև առանձին գրանցել կայքի մոբայլ տարբերակի հասցեն: Ըստ գրանցման հերթականության` մասնակից կայքերը կստանան նաև մասնակցության հատուկ համարներ, որոնք այնուհետև կօգտագործվեն քվեարկության ժամանակ:

Գրանցումը կմեկնարկի հոկտեմբերի 30-ին, ժամը 18:00:00-ին և կփակվի նոյեմբերի 19-ին, ժամը 18:00:00-ին:

Մրցույթի անցկացման ընթացակարգը

Armnet Awards մրցույթն անցկացվելու է երկու փուլով: Առաջին փուլի ընթացքում Ժյուրիի անդամները կուսումնասիրեն և կգնահատեն բոլոր առաջադրված կայքերը և մրցույթի ավարտից մեկ շաբաթ առաջ` նոյեմբերի 30-ին, կընտրեն յուրաքանչյուր անվանակարգի հավակնորդ կայքերը: Մրցույթի երկրորդ փուլի ընթացքում ժյուրին կընտրի յուրաքանչյուր անվանակարգի հաղթող կայքը և մրցույթի գլխավոր մրցանակակրին:
Ժյուրիի ընտրությանը զուգահեռ կանցկացվի նաև SMS քվեարկություն: Բոլոր ցանկացողները SMS հաղորդագրության միջոցով կկարողանան քվեարկել իրենց նախընտրած կայքի օգտին: Քվեարկելու համար պետք է հեռախոսահամարից ուղարկել SMS 10-41 կարճ համարին (1 SMS-ի գինը` 50 դրամ, ներառյալ ԱԱՀ), բովանդակության մասում գրելով Armnet բառը և նշելով նախընտրած մասնակից կայքի մասնակցության հատուկ համարը: SMS քվեարկությանը կարող են մասնակցել նաև հայկական ինտերնետի այցելուները արտերկրից: Երկրների ամբողջական ցանկը, յուրաքանչյուր երկրից քվեարկելու համար հատուկ կարճ համարը և կարճ հաղորդագրության արժեքը կարելի է գտնել ArmNet Awards 2012-ի պաշտոնական վեբ կայքում: Մեկ կայքի օգտին յուրաքանչյուր բաժանորդ կարող է քվեարկել միայն մեկ անգամ, սակայն նույն բաժանորդը կարող է քվեարկել այնքան թվով կայքերի օգտին, որքան կցանկանա: Քվեարկության արդյունքում ամենաշատ ձայներ հավաքած կայքը կճանաչվի «Ժողովրդական ընտրություն» անվանակարգի հաղթող:SMS քվեարկությունը կմեկնարկի նոյեմբերի 22-ին, Երևանի ժամանակով ժամը 12:00:00-ին և կավարտվի դեկտեմբերի 8-ին, Երևանի ժամանակով ժամը 18:00:00-ին: SMS քվեարկության արդյունքներին կարելի է հետևել www.armnetawards.am կայքում, յուրաքանչյուր հավակնորդ կայքի կողքին: Տվյալները կթարմացվեն յուրաքանչյուր 5 րոպեն մեկ անգամ:

Անվանակարգեր

Մրցանակաբաշխության ընթացքում մրցանակներ կհանձնվեն հետևյալ անվանակարգերում.

Դիզայն և հարմարավետություն - տրվում է լավագույն դիզայն և օգտագործման հարմարավետություն ունեցող կայքին
Նորարարություն - տրվում է այն կայքին, որը վերջին երկու տարվա ընթացում առաջինն է նշանակալի տեխնոլոգիական նորամուծություն մտցրել կայքում
Տեխնիկական կատարում - տրվում է այն կայքին, որը լավագույն կերպով է իրականացրել տեխնիկական լուծումները
Բովանդակություն - տրվում է այն կայքին, որն ունի օրիգինալ, հետաքրքիր, գրագետ բովանդակություն: Այս անվանակարգի համար հատուկ առավելություն կստանան այն կայքերը, որոնք ունեն գրագետ հայերեն տարբերակ
Տարվա առաջընթաց - տրվում է այն կայքին, որը վերջին տարվա ընթացքում հատուկ նվաճումներ է ունեցել, կտրուկ ժողովրդականություն է ստացել կամ տեխնոլոգիական մեծ առաջընթած է գրանցել
Հասարակական ազդեցություն – տրվում է այն կայքին, բլոգին, կամ անձին, ով սոցիալական հարթակներում ցուցաբերած ակտիվության արդյունքում ունեցել է մեծ հասարակական ազդեցություն
Գլխավոր մրցանակ - տրվում է այն կայքին, որը բոլոր անվանակարգերով ժյուրիի կողմից ստացել է առավելագույն քանակով միավորներ
Ժողովրդական ընտրություն - այս անվանակարգում հաղթող կճանաչվի հանրային քվեարկության արդյունքում ամենաշատ ձայներ հավաքած կայքը
Orange-ի հատուկ մրցանակ - մրցանակը տրվում է Orange ընկերության կողմից, լավագույն բջջային հավելվածի համար: Անվանակարգում մասնակցելու համար անհրաժեշտ է գրանցել հավելվածի էլեկտրոնային հղումը www.armnetawards.am կայքում կամ ուղարկել հավելվածը info@armnetawards.am հասցեին:

Շահերի Բախում

Ժյուրիի այն անդամները, որոնք այս կամ այն կերպ առնչություն ունեն մասնակից կայքերից որևէ մեկի հետ, չեն մասնակցում տվյալ կայքի գնահատմանը: Եթե ժյուրիի անդամներից որևէ մեկը կայքերից մեկին չափազանց բարձր կամ ցածր գնահատական է տվել, ժյուրիի մյուս անդամները կարող են պարզաբանումներ պահանջել տրված գնահատականի համար: Կազմակերպիչ ընկերությունների և հանրային քվեարկությունը տեխնիկապես սպասարկող ընկերություններին պատկանող կամ վերջիններիս կողմից ստեղծված կայքերը չեն կարող մասնակցել մրցույթին: